الثلاثاء , 6 ديسمبر 2016

نصائح لترتيب خزانتك بكل سهولة و دون تعب

دولابك مليان هدوم و جملة “ انا معنديش حاجة البسها ” دايما على لسانك ؟ النهاردة هنعرفك على مجموعة  نصائح لترتيب خزانتك  و اللي هتساعدك  ترتبي الدولاب و تظبطيه بكل سهولة .

عملية ترتيب الدولاب في الغالب عملية رخمة بنحاول نتجنبها ، لكن النهاردة هنديكي شوية خطوات لو مشيتي عليها عملية ترتيب الدولاب هتكون أسهل و أبسط و مريحة أكتر .

نصائح لترتيب خزانتك

اول حاجة : اعمل جرد للدولاب .. طلع اي قطعة ما لبستهاش بقالك سنة و أتخلص منها .
اعمل الخطوة اللي فاتت مع كل حاجة الا :
١- القطع اللي صرفت عليها مبلغ و مش محكومة بالموضة.
٢- القطع القديمة اللي بتعتبر من الكنوز .

اقرأ أيضاً : تعرف على الطريقة المثالية لتخزين ملابس الصيف

تاني حاجة : قلل الكولكشن بتاع التيشرتات بتاعك .. خلي بس اكتر ٧ تيشيرتات بتحبها و أتخلص من الباقي .
انت و انا عارفين انك ما بتلبسش غير الكام تيشيرت اللي بتحبهم و الباقي بيفضلوا مرميين في الدولاب لحد ما لونهم يتغير من الركنة .

تالت حاجة : رص الحاجات في دولابك في مجموعات .. الجواكت ورا بعض .. القمصان جنب بعض .. البنطلونات في جنب مع بعض و هكذا .
ده هيوفر عليك وقت التدوير .. لما تعوز قطعة معينه هتروح تدور عليها في المجموعة بتاعتها مش هتقلب الدولاب كله .

رابع حاجة : خلي الجزم دايما في مكان ظاهر .. الجزم المستخبية بتتنسي و بتلاقي نفسك بتلبس بس اللي قدام عينك و الباقي ناسي انه عندك اصلاً .

اقرأ أيضاً : نصائح ذهبية لتخزين الملابس الشتوية

خامس حاجة : لو كنتي زينا و بتحضري شنطتك في اخر لحظة قبل ما تنزلي مالبيت يبقى هيريحك جدا لو رتبتيهم اعتمادا على الألوان من الفاتح للغامق .
كده مش هتاخدي وقت .. قبل ما تنزلي هتاخدي الشنطة اللي لايقة مع ألوان هدومك و تحضريها في ثواني .. وماتنسيش ترجعيها مكانها بالظبط لما تروحي.

سادس حاجة : تجنبوا تماماً أنكم تعلقوا اكتر من قطعة على نفس الشماعة .. الحاجات اللي تحت بتتنسي و ممكن تفضل تدور عليها كتير و ما تلاقيهاش .

اخر نصيحة : استثمر فلوسك في كام شماعة غاليين .. الشماعات السلك الرخيصة بتغير شكل الهدوم لو ما بتسحملش الهدوم التقيلة و بتتني
الشماعات القوية بتحافظ على القطعة في حالة ممتازة و فيه شماعات خاصة البناطيل و الجيبات و شماعات خاصة للفساتين و غيرها للجواكت و البلوزات .

مرحلة ترتيب الدولاب مش هتخلص في يوم و ليلة بس نوعدك انك هتحس بسعادة و ارتياح لما تفتح دولابك تلاقيه رايق و مترتب و هدومك واضحة فيه

نصائح لترتيب خزانتك

دلوقتي و بعد ما تعرفتي على مجموعة نصائح لترتيب خزانتك كل اللي عليكي تعمليه تتبعي الخطوات البسيطة دي و تتمتعي بخزانة مترتبة على طول.

سيعجبك أيضاً

2 تعليقان

اضف رد

لن يتم نشر البريد الإلكتروني . الحقول المطلوبة مشار لها بـ *

*