الجمعة , 9 ديسمبر 2016
اشتري قطعة عالية الجودة ووفر فلوسك

اشتري قطعة عالية الجودة ووفر فلوسك

معادلة الشراء اللي كلنا بندور عليها (شيك + قطعة عالية الجودة  + مش غالي)

قطعة عالية الجودة من الملابس وتوفير فلوسك وجهان لعملة واحدة ، الجودة العالية هتغنيك عن شراء قطع أخرى لمدة سنين ، أما الجودة العادية أو الرديئة هتبان مع تكرار الغسيل وهتضطرك لشراء قطع جديدة.

 ملبس خان بينصحك تشتري قطعة جودتها عالية حتى لو غالية شوية أفضل ما تشتري قطع رخيصة دلوقتي وتشتري غيرها بعد فترة .

شراء القطعة الغالية هيعلمك حاجتين مهمتين جداً:

1- هتتأنى في اختيار القطعة: لأنك هتدفع فيها مبلغ وبالتالي مش هتشتري الحاجة الإ لو محتاجها فعلا و ده هيخلي دولابك دايما مترتب ومافيهوش حاجات مركونة اتدفع فيها فلوس وما اتلبستش .

2- شراء قطعة جودتها عالية هتدوم لفترة طويلة وهتستخدمها لسنين ومش هتضطر تنزل تجيب بديل ليها كل شوية وبالتالي هتوفر على المدى الطويل .

كيفية اختيار  قطعة عالية الجودة  تدوم فترة طويلة :

1- احكم على جودة القطعة قبل ما تشتريها :

وانت في رحلة الشوبنج هيعدي عليك قطع عجباك وسعرها معقول لكن ماركتها مش معروفة علشان تقدر تحكم على جودتها من اسمها .. هنا بقى لازم تكشف عليها بنفسك

         أ. بص على الغرز اللي في القطعة .. هل الخطوط بتاعت الغرز مستقيمة ومتساوية في البعد بينها وبين مساحة القماش اللي حواليها ؟

        ب. امسك القطعة من الجنبين و شدها برفق وشوف لو الغرز هتقطع أو هتطلع صوت مع الشد .

        ج. بص على تفاصيل القطعة .. هل القطعة متقفلة كويس؟ لو القطعة فيها تطريز هل هو متخيط كويس ولا بيقع كل ما تحرك القطعة؟ لو القطعة دي بنطلون جينز مثلا هل فيه التنية اللي بتبقى في الرجل من تحت؟ هل الزراير بتاعت القطعة متثبتين كويس ؟

2- خد فكرة قبل ما تشتري :

لو أنت مش خبير في معرفة جودة القطع ممكن تزور محل من البراندات الكبيرة، أدخل وشوف القطع ، جربها وشوف شكلها في اللبس عامل ازاي ونوع قماشتها ايه و ازاي متقفلة .. بعد كذا تجربة هتلاقي نفسك بتحس بالفرق بسهولة .

3- عدم الاستعجال :

مش أول ما تلاقي قطعة فيها كل الشروط اللي فاتت دي تشتريها؛ لف ودوّر وهتلاقي قطع جودتها أعلى وسعرها أنسب في لأماكن أخرى  .. قبل ما تدفع وتشتري لازم تتأكد 100 % ان هي دي القطعة المناسبة لأنك فالأخر هتدفع فيها مبلغ ومش عايز تشتري غيرها بعد وقت قصير .

4- اعرف الأماكن اللي تناسبك :

نزلت ودورت وجربت القطع و أخيرً لقيت اللي أنت عايزه في مكان معين ؟

اعرف المكان ده لو ارتحت في القطع بتاعته وخليه دايما أول مكان تروح له وأنت نازل تعمل شوبنج بعد كده شوف غيره .. بعد فترة هتلاقي نفسك عرفت كل الأماكن اللي عندها قطع مناسبة وفي نفس الوقت ماشية مع ميزانيتك ورحلة التسوق هتبقى أسهل وأسرع وأفضل .

سيعجبك أيضاً

تعليق واحد

  1. اسماء البحيري

    موضوع مفيد جداا لان مش كل الناس فاعمه الكلام ده في ناس فاكره ان الواحد لما بيدخل المحلات الاغلى انها قنعره او كلام فاضي مع ان هما الي مش فاهمين ان ذي ما المقوله القديمه بتقول “الغالي تمنه فيه”!

اضف رد

لن يتم نشر البريد الإلكتروني . الحقول المطلوبة مشار لها بـ *

*