الإثنين , 5 ديسمبر 2016
للرجال : فورمة الساحل في ٣ خطوات، كتالوج الجسم المثالي

للرجال : فورمة الساحل في ٣ خطوات، كتالوج الجسم المثالي

( البنچ بلاطة والبطن شيكولاته ) كلنا عارفين المثل ده ، وكل مرة الصيف بيفاجئنا قبل ما نكون جاهزين و ماتخلصناش من كرش الشتاء و لا عملنا السيكس باكس واللي هي أهم علامة من علامات فورمة الساحل و الجسم المثالي .

كتب محمود مرزوق @marzouk90

خلينا متفقين إن كلنا عندنا سيكس باكس بس مستخبية تحت طبقة من الدهون ، وكمان إن الموضوع محتاج استمرارية و إرادة عشان تتخلص من الدهون الزيادة دي وتبدأ العضلات  تظهر بشكل واضح وبالتالي تتباهى بيها وتبقى شبه الموديلز اللي بيطلعوا في الاعلانات و الفيديو كليبس مع هيفا و إليسا.

أيضاً : الكرش و طريقة اخفاؤه باللبس المناسب

دول تلات نصايح تاخد بالك منهم عشان توصل لـ فورمة الساحل والجسم المثالي الصيف ده

  • الأكل ثم الأكل ثم الأكل كمان مرة

فورمة الساحل الجسم المثالي

فيه مثل أمريكي مشهور جداً بيقول ” عضلات البطن تصنع في المطبخ ” .. عشان كده ضروري جدا إنك تهتم بكمية البروتين في أكلك وتحرص إنها تكون أكبر هي والخضروات ، كمان قلل الكاربوهايدرات والنشويات على قد ما تقدر، و نوّع مصادر أكلك بحيث يكون في فاكهة وخضروات ومكسرات، وطبعًا بطل الچانك فوود تمامًا .. الافضل تخلي معاك وجبات صغيرة ومكسرات ( غير محمصة ) طول الوقت عشان وقت الجوع متاكلش أي حاجة وخلاص تسد بيها جوعك.

أيضاً : أنواع أجسام الرجال وما يناسبها من ملابس

  • التمرين والحركة

فورمة الساحل الجسم المثالي

اهتم بتمارين الكارديو اللي بتزود سرعة الحرق في الجسم،  وتمارين الأوزان ” الحديد ”  اللي  بتعلّي نسبة العضلات فيه، وخليك عارف إن العضلات وهي بتتبني بتحرق سعرات حرارية .. أهم حاجة تبقى في حركة مستمرة ، اختار برنامج رياضي معين واستمر عليه على الأقل تلات شهور عشان تشوف نتائج .. وكمان ممكن تستثمر جزء من فلوسك في ساعة سمارت من اللي بتقيس عدد الخطوات اللي مشيتها والسعرات اللي حرقتها عشان تبقى عارف بالظبط اللي ليك واللي عليك .

أيضاً : الملابس الرياضية التي تحتاجونها أثناء ممارسة الرياضة

  • النوم والتحكم في الضغط

فورمة الساحل الجسم المثالي

النوم عامل مهم جدًا فى خسارة الدهون في الجسم ، وده معناه إنه ضرورى الحفاظ على عدد ساعات نومك و اللي المفروض تكون من 7 لـ 9 ساعات في اليوم .. كمان قاوم إنك تبقى في ضغط مستمر لإن الضغط بيضر الجسم جدًا وبيقلل سرعة الحرق .. ده غير إنك لو كنت من الناس اللي بتاكل لما بتتضايق فالدنيا عندك هتبوظ خالص وده اللي إحنا عايزين نتجنبه تماماً.

أيضاً : قطع أساسية في خزانة أي رجل .. تعرف عليها الآن

في النهاية محتاج تهتم بكل الخطوات دى بشكل مستمر عشان تشوف نتايج كويسة.. وتعرف إن للوصول لجسم مثالي وتبقى عامل فورمة الساحل محتاج إنك تكون صبور عشان النتايج الطبيعية بتاخد وقت على ما بتظهر بعكس الطرق التانية اللي دايماً بتدي شكل جميل بس على حساب صحتك .. عشان كده ضروري جداً يكون عندك صبر و إرادة.

سيعجبك أيضاً

تعليق واحد

اضف رد

لن يتم نشر البريد الإلكتروني . الحقول المطلوبة مشار لها بـ *

*