الثلاثاء , 6 ديسمبر 2016
الطريقة المثالية لـ غسل الملابس

الطريقة المثالية لـ غسل الملابس

كل الناس متخيلة انها بتعرف تغسل الهدوم صح .. شوية مية و مسحوق غسيل و كلور في الغسالة و شغل و الف مبروك لكن اللي متعرفهوش ان غسل الملابس  مش بالبساطة دي .. هو مش صعب بردو لكن محتاج شوية عناية و تركيز علشان هدومك اللي بتحبها ما تبوظش و تزعل عليها .

اول مرحلة من مراحل  غسل الملابس   :

اقرأ التعليمات اللي على هدومك .. احنا هنساعدك تفك الشفرة بكل سهولة

main.original.466x530

1- رمز الغسالة زي اللي موضح في الشكل بيرمز لدرجة الحرارة اللي لازم تستخدمها و انت بتغسل القطعة دي .. لو الرمز فيه نقطة واحدة يبقى تغسل بمية ساقعة .. لو نقطتين يبقى مية دافية .. تلات نقط يبقى تغسل بمية سخنة …و في معظم الاحيان بيبقى مكتوب جوا الرمز درجة الحرارة المثالية اللي القطعة تتغسل فيها … و لو عليه حرف X يبقى خد القطعة وديها لاقرب مكان بيغسل غسيل جاف .

2- علامة المبيض (الكلور) وهي شكل المثلث بتوضحلك لو لازم تستخدم او تتجنب تماما استخدام الكلور .. لو المثلث ابيض سادة يبقى ممكن استخدامه .. لو عليها X يبقى اوعى تستخدم الكلور .

– علامة التجفيف و هي مربع جواه دايرة بتحددلك طريقة التجفيف .. لو الدايرة فاضية يبقى ممكن تستخدم اي حرارة في التجفيف .. لو فيها نقطة يبقى استخدم حرارة منخفضة و لو فيها نقطتين يبقى استخدم الحرارة العادية ولو فيها 3 نقطات يبقى استخدم الحرارة العالية .

4- علامة التنظيف الجاف بتوضحلك سواء لازم تستخدم التنظيف الجاف لتنظيف القطعة دي ولا لا  .. لو لقيت علامة X يبقى ممكن تستخدم الغسالة .

المرحلة التانية من  غسل الملابس   :

التحضير لعملية الغسيل .

1- قسم الهدوم اللي هتتغسل لمجموعات :الالوان الغامقة – الالوان الفاتحة – الابيض – و الهدوم الرقيقة زي الملابس الداخلية مثلا .

2- اتأكد ان الجيوب فاضية مافيهاش فلوس او مناديل كلينكس علشان بتتهري و تلزق في الهدوم بتاخد وقت طويل علشان تنضفها .. اقلب البنطلونات الجينز .. اقفل السوست بتاعت البنطلونات و الجواكت ..لو فيه قطع فيها بقع صعبة حط عليها معجون معمول من مسحوق الغسيل و شوية مية … و حطي الملابس الداخلية و اللانجيري و الشرابات الفوال بتاعتك في شبكة علشان ما تبوظش .

المرحلة التالتة من  غسل الملابس   :

مرحلة تحديد درجة حرارة مية الغسيل .

1- الغسيل بمية ساقعة : وهو المفضل لغسيل القماشات الحساسة و الكنزات و الجينز .. ده بالاضافة انه بيحمي الهدوم الجديدة الملونة من ان الوانها تبهت .

2- الغسيل بمية دافية : وهو مناسب الملابس البيضة و الفاتحة .. باضافة مسحوق الغسيل للمية الدافية بيتساعد انك تقضي على البقع بالاضافة لقتل البكتيريا .

3- الغسيل بمية سخنة : مناسب للقطع اللي فيها بقع صعبة و الحاجات اللي بتحتاج تعقيم زي فوط الوش و فوط المطبخ .

معرفة انواع مسحوق الغسيل .

1- كلور الملابس الملونة : بيستخدم مع الهدوم الملونة لانه مابيئذيش الوانها و بيساعد في ازالة البقع الصعبة .

2- كلور الملابس البيضا : بيفتح اللون الابيض .. و انت بتستخدمة تجنب تماما انه يلامس الملابس الملونة و لو غسالتك معندهاش درج مخصص للكلور ده يبقى احرص انك تغير المية قبل ما تغسل فيها الحاجات الملونة .

3- منعمات الهدوم : زي الكومفورت و الداوني و غيرهم و بيستخدموا علشان يحافظوا على نعومة الهدوم و متوفرين بروايح لطيفة .

المرحلة الرابعة من  غسل الملابس  :

 مرحلة الغسيل .

1- ابدأ بملي الغسالة بالمية .

2- اول ما المية توصل لتلت الغسالة ضيف مسحوق الغسيل و الكلور .

3-اول ما المسحوق و الكلور يدوبوا تماما في المية ضيف الهدوم و احرص انهم ما يملوش اكتر من تلتين الغسالة .

اختيار البرنامج المناسب لنوع الهدوم :

1- ال normal \ regular : بيدمج حركة قوية مع لفات سريعة و هو برنامج مناسب للقطع اللي فيها بقع صعبة  و الاقطان و الكتان و الجينز و الفوط و الملايات .

2- ال permanent press : بيدمج حركة قوية مع لفات بطيئة و ده مناسب للمواد المصنعة زي البوليستر و الاصواف .

3- ال Delicate : بتتدمج حركة بطيئة مع لفات بطيئة وهي ممتازة للحراير و اللانجيري و المنسوجات و المواد اللي فيها تطريز و زخارف .

4- الغسيل اليدوي : لو القطعة مطلوب انها تتغسل على الايد يبقى لازم تعمل كدة .. املا حوض او بانيو او طبق بمية ساقعة و شوية منظف غسيل و دوبهم و انقع الهدوم فيها لمدة تتراوح ما بين 15 لـ 20 دقيقة و بعد كده اشطفهم مرتين تلاتة و انشرهم .

اختيار البرنامج المناسب للتجفيف :

1- العادي (بحرارة عالية) : مناسب للملابس البيضا و الجينز و الملايات و الفوط .. المهم تجنب تستخدمه مع القطع اللي اتغسلت بمية سخنة علشان ما تتلفهاش من كتر الحرارة .

2- الحرارة المتوسطة : بيستخدم مع الملابس الملونة علشان ما تبهتش و ما تتكرمش او تفقد شكلها .. بس خلي بالك و ما تستخمهوش مع الملابس الرقيقة علشان هيتلفها .

3- الحرارة المنخفضة : بيستخدم سرعة منخفضة لتجفيف الملابس الرقيقة و مناسب كذلك للملابس الصوفية .

اخر مرحلة :

النشر .. وهي اما بتعليق الهدوم او بوضعها على سطح مستقيم .

1- الاقطان و البوليستر و الحرير و اي ملابس مصنوعة من مواد ما بتتمددش بتتنشر عادي على المنشر .

2- الملابس المصنوعة من الاصواف (التريكو) بتتفرد على سطح مستقيم و تتساب لحد ما تنشف لانها لو اتنشرت هتتمدد و هتفقد شكلها .

نصايح مفيدة :

– حط فوطة صغيرة قطنية نظيفة مع دورة التجفيف لو عايز الملابس تتجفف بسرعة اكبر .

– لو نسيت الهدوم في المجفف و اتكرمشت منك حط معاهم فوطة مبلولة نص بلة و شغل المجفف لمدة 15 دقيقة بس و الكرمشة هتختفي .

و بالطريقة دي اتعرفتوا على الطريقة الصحيحة لـ  غسل الملابس   بكل سهولة و بطريقة بسيطة .

سيعجبك أيضاً

تعليق واحد

اضف رد

لن يتم نشر البريد الإلكتروني . الحقول المطلوبة مشار لها بـ *

*