الثلاثاء , 6 ديسمبر 2016

تخزين الملابس الشتوية بطريقة صحيحة

الجو بدأ يبقى دافي و ده معناه ان وقت شيل و تخزين اللبس الشتوي جه و علشان اللبس الشتوي بيتميز بانه غالي التمن و معظم المواد المصنوع منها بتبقى حساسة قررنا اننا نقولكم على الطريقة المثالية لـ  تخزين الملابس الشتوية  في كام خطوة بسيطة .

تابعوا معانا الخطوات التالية و طبقوها بالظبط عشان تحصلوا على أفضل نتيجة .

الطريقة المثالية لـ  تخزين الملابس الشتوية   

1- كل ما كان اللي هتخزنة اقل كل ما المهمة هتكون اسهل و اسرع :

بما انك هتفضي دولابك بالكامل و هتبقى الهدوم كلها بره و قدام عينك و جاهزة للتخزين , استغل الفرصة في انك تتبرع او تتخلص من الحاجات اللي بطلت تلبسها سواء علشان صغرت او اتبهدلت او موضتها انتهت .

اقرأ أيضاً : تعرف على الطريقة المثالية لتخزين ملابس الصيف

بكده انت بتوسع مكان للحاجات الجديدة اللي هتشتريها الشتوية الجاية و بتخف من على نفسك الحاجات اللي هتخزنها و هتبسط كمان انسان محتاج و تحميه من البرد .

1

2- اغسل كل حاجة :

ممكن يكون شكل الهدوم قدامك نضيف لكن اللي ما تعرفوش ان مع الركنة لفترة طويلة بقع غير ظاهرة زي بقع البرفان او العرق بتتعتق و تظهر و تخلي ريحة الهدوم وحشة و احيانا بتعمل بقع ما بتروحش .. ده غير ان بعض الروايح دي بتجذب العتة و بالتالي ممكن هدومك تتاكل وانت مش حاسس .

اغسل الهدوم اللي ينفع تتغسل في البيت بأسخن مية ممكن الهدوم تستحملها ( مكتوب على كل قطعة اقصى درجة حرارة ليها) و الباقي ابعته يتنضف في الاماكن المخصصة .

2

اقرأ أيضاً : تعرفوا على الطريقة الصحيحة لترتيب خزانة الملابس 

3-استخدم النفتالين :

اللي ما يعرفش ايه النفتالين ده هو مادة بتستخدم علشان تبعد العتة و الحشرات عن هدومك عند التخزين و اشهر شكل ليها هو الكور البيضا الصغيرة .

النفتالين ليه ريحة مميزة بس مش قوية قوي لو مش حاببها ممكن تحط مع الهدوم بالاضافة للنفتالين كيس من معطرات الجو اللي بيبقى فيه حبيبات .

3

4- اختار مكان التخزين و ادواته بعناية .

مكان التخزين لازم يبقى نضيف تماما و متهوي كويس .. ممكن تحط هدومك اللي بتطبق في علب كرتون و تكتب على كل علبة نوع الهدوم اللي جواها (بيجامات – بلوفرات – بنطلونات – كوفيات ) .. ممكن تحطهم في علب بلاستك محكمة الغلق بتتباع في محلات المستلزمات المنزلية و دي بننصح بيها علشان بتحمي الهدوم من الحشرات و الرطوبة بالاضافة انها شفافة فممكن تشوف اللي جواها بسهولة .. و اخر اقتراح انك تحطها في كيس بلاستيك و تسحب منه الهوا بالمكنسة بتاعتك و دي ارخص طريقة و اكتر و احدة فيهم بتوفر مساحة و فلوس .

4

5- مين يتخزن ازاي :

طبق البلوفرات و البلوزات و الحاجات الخفيفة و الطرية .. علق اي بالطو .. جاكت جلد ..البدل الصوف و اي حاجة تقيلة التطبيق ممكن يبوظ شكلها خصوصا انها هتفضل متطبقة لشهور .. و اتأكد ان الشماعات اللي هتعلق عليها حاجاتك قوية و متينة .

6- قول معايا “لا” للشماعات السلك .. ها .. قلت ؟

5

الشماعات اللي هتعلق عليها حاجاتك ماينفعش تكون  شماعات معدن لانها ضعيفة جدا و هتتني تحت تقل البالطو بتاعك او بدلتك و هتبوظ شكلهم تماما .. الشماعات الخشب و البلاستيك اقوي و هتحافظ على شكل الحاجة مهما كانت تقيلة .. بعد بقى ما تعلق حاجاتك غطيهم بكيس بلاستك و اسحب منه الهوا .

7- فكر في المستقبل :

خليك فاكر ان الشتا دايما بيطب علينا فجأة و عليه فانت بتبقى عايز تطلع الحاجات المهمة و الاساسية اللي تمشيك لحد اخر الاسبوع لما تفضى و تطلع بقيت الهدوم الشتوية .. عشان كده احرص انك تحط الحاجات دي قدام علشان تطلعهم بسرعة منغير تدوير و نعكشة .

8- مكان التخزين و مواصفاته :

و دي من أهم خطوات  تخزين الملابس الشتوية   ، خزن هدومك في مكان فيه تهوية كويسة , بارد , جاف و بيوصلوش نور الشمس علشان ببساطة نور الشمس ممكن يخلي الهدوم تبهت .. و الاماكن اللي فيها رطوبة العتة و الحشرات بتحبها .. علشان كده اختار المكان اللي هتخزن فيه حاجاتك بعناية .

9- خلي عينك على حاجتك .

عارفين ان اخر حاجة انت عايز تعملها انك تبص على هدومك الشتوية و انت لابس الشورت و الفانلة بتوعك او فستانك القطن لو انتي بنت بس كل فين و فين بص على حاجتك الشتوية و اتأكد انها متهوية كويس و مش طالعلها ريحة وحشة او فيه حشرات ناحيتها .

10 – خلي في بالك :

شوية حاجات مهمة اتأكد انك بتعملها قبل ما تخزن حاجتك :

     – فضي جيوب هدومك .. علشان ما تخزنهاش و بعدين تكتشف انك ناسي بطاقتك ولا رخصتك في جيب البالطو و تضطر تروح و تطلعه تاني .

       – امسح و نضف البوت بتاعك من الطين و التراب و اثار المطر لانها بكل سهولة ممكن تبوظ الجلد او الشامواه بتاعه لو البقعة فضلت عليه كتير ..  و ماتنساش تحشيه بورق جرايد او مجلات ملفولة لو كان البوت طويل علشان ما يتنيش و يبوظ .

و بالطريقة دي بيتم  تخزين الملابس الشتوية   بطريقة صحيحة و هتضمنوا إن الملابس هتبقى في أفضل حالة لما تيجيوا تستخدموها بعد سنة .

سيعجبك أيضاً

5 تعليقات

  1. Thank you, I have recently been looking for info approximately this topic for a while and yours is the best I have came upon till now.

  2. Hey, thanks for the blog.Thanks Again. Fantastic.

  3. Really appreciate you sharing this blog article. Fantastic.

  4. I really liked your blog.Really looking forward to read more. Keep writing.

اضف رد

لن يتم نشر البريد الإلكتروني . الحقول المطلوبة مشار لها بـ *

*