الإثنين , 5 ديسمبر 2016
الموديل محمد توكل يكشف أسرار الموديلنج لملبس خان

الموديل محمد توكل يكشف أسرار الموديلنج لملبس خان

شفتوه في إعلان تي إي داتا واستخدموا صورتة في السوشال ميديا .. بعدها صوره غرقت كوبري أكتوبر والدائري في حملة شبكة أورانج .. يمكن كانت دي أول مرة تتعرفوا عليه لكن ملبس خان و  محمد توكل أصحاب من زمان وعشان كده قررنا نكون أول موقع يعمل معاه لقاء نسأله فيه شوية أسئلة ممكن تكون بتدور في دماغكم.

محمد توكل

لقاء ملبس خان و محمد توكل

في الأول عرفنا عن نفسك .. الإسم والسن وبتشتغل إيه بجانب إنك موديل إعلانات ؟

 محمد توكل ، ٢٩ سنة ، باشتغل في السوشيال ميديا.

عملت كام إعلان وإيه وهنشوفك عالتلفزيون تاني إمتى ومع مين ؟

عملت ٥ إعلانات بدون ذكر أسماء ( لافيستا ، تي إي داتا ، بورتو ، أورانج ، سيراميكا كليوبترا) ..رمضان القادم إن شاء الله هيبقي الحدث الإكبر  الحمد لله حتى الآن، وهي حلقة في برنامج مصطفي حسني الجديد على قناة النهار.

سؤال كتير بيبقوا نفسم يسألوه لأي راجل بيطلع في التلفزيون : هم بيحطوا للرجالة ميك أب بردو ولا لا ؟ ولو آه يبقى بيحطولكم إيه ؟

لا الرجالة مش بيحطوا ميك أب أو أنا عن نفسي محطتش ومشوفتش في كل اللي اشتغلت معاهم حتى الآن رجالة بتحط ميك أب، هو بس بيبقى في لمعة في الوش بتتشال بمنديل معين، لكن ميك أب و الحاجات الكتير اللي بنشوفها في البنات دي لا.

سؤال في حتتنا بقى .. هل اللبس اللي بتظهر بيه في الإعلانات بيكون بتاعك ولا فيه ستايليست وسبونسر بيوفرولكم لبس وبينسقوه عليكم ؟

بالنسبة للبس دا موضوع مرهق لما بتتقبلي في أي إعلان، بتروحي تعملي بروفة ملابس تاخدي دولابك كله وهم ينقوا منه اللي يعجبهم، وكمان هم بيكونوا جايبين معاهم برضو لبس بس كنوع من التوفير بيحاول يلاقي حاجة من عندك لو هي هتليق على الدور..مفيش إعلان مش بيبقى فيه ستايليست، ولو ماختاروش حاجة من عندك بيجيبلك من عنده وبترجعيهم قبل ما تمشي  .

هل درست أي حاجة ليها علاقة بمجال الإعلانات ولا الموضوع جه معاك صدفة؟

لا دراستي كانت سياحة وفنادق مالهاش أي علاقة تماماً الموضوع صدفة بحتة.
محمد توكل

هي الإعلانات اللي بتصوروها بتخلص في يوم واحد ولا بتحتاج تاخد أجازة من شغلك وتتفرغ للتصوير أكتر من يوم؟

الإعلان الواحد ممكن يقعد يتصور في أسبوع بس إنتي بيبقى ليكي مشهد أو مشهدين أو تلاتة ، لو مشاهدك ورا بعض ممكن تخلصي في يوم لو مش ورا بعض هتضطري تروحي وتيجي تكملي ، بيتحددلك من قبلها إن تصويرك يوم كذا و يوم كذا فلازم تأخد إجازة.. إوعي تصدقي حد بيقولك دا كام ساعة وهتروح شغلك بعدها ، اقل حاجة ودي مبتحصلش ٨ ساعات.

طيب لو فيه حد بيفكر يدخل المجال ده تنصحه يعمل إيه ؟

لو حد عايز يدخل المجال دا انصحه ياخدها هواية ودي كلمة سمعتها من صاحب مكتب كاستنج ، إلا لو هوعايز ياخدها سلم للوصول للتمثيل زي ما ممثلين كتير وصلوا فيروح يعمل كاست كل شهرين ولا حاجة ، في المهندسين كتير هقولكم على أشهرهم  بالوصف :
  • حازم الاصواني شارع الاعناب بجوار سفاره قطر
  • مكتب محي العمارة اللي في وش قهوة المعلم برضو في جزيرة العرب بس المدخل من الشارع الرئيسي الدور التالت

    إيه أحلامك وطموحاتك في المستقبل ؟ عايز تكمل في مجال الموديلنج؟ ولا بتفكر تجرب التمثيل ؟

    أنا كان حلمي طول عمري أبقي ممثل بس ماعرفتش أروح فين وأعمل إيه ، ف أكيد بفكر اتجة للتمثيل بس عشان الواحد يمثل مش حاجة سهلة لازم تدريب و ورش ودا اللي هشتغل علية الفترة الجاية .

    العائد المادي من الموديلنج كافي إن اللي حابب يبقى موديل يعيش بيه ولا لازم يكون عنده شغل تاني ؟

    العائد المادي من الإعلانات ممكن تعيش بيه جنب أي شغلانة لكن ميفتحش بيت ، إلا لو إنت صاحب المخرج وهتعمل على الأقل إعلانين تلاتة في الشهر .
    محمد توكل

    هل كان فيه سؤال معين مستني إن إحنا نسأله وماتسألش؟  🙂

    لا في النهاية بشكركم على الحوار دا ، أنا فعلاً مبسوط ويا رب يكون حوار مفيد للي عايز يدخل المجال دا.
    دي مش هتكون آخر مرة تشوفوا تعاون ولقاءات بين ملبس خان ومحمد توكل بس لحد ما تشوفوا مشروعنا المشترك القادم تابعوا حسابات محمد توكل على السوشال ميديا :
    تويتر
    M_tawakol
    .. فيسبوك
     .. سناب تشات
    M_tawakol@
     .. انستجرام
    M_tawakol@
    تابعوا محمد توكل في أعماله الجاية ولو عندكم أي سؤال حابين توجهوه ليه سيبوه في قسم التعليقات وهنخليه يرد عليه شخصياً.

سيعجبك أيضاً

تعليق واحد

  1. حوار حلو شكرا ليكم

اضف رد

لن يتم نشر البريد الإلكتروني . الحقول المطلوبة مشار لها بـ *

*