الثلاثاء , 6 ديسمبر 2016

الموديلات المختلفة للبدل الرجالي

موديلات البدل الرجالي كتيرة و أحيانا ده بيخلي مهمة اختيار البدلة الصح للمناسبة الصح صعبة شوية .. عشان كده قررنا نكلمكم عن  الموديلات المختلفة للبدل الرجالي  و فين كل بدلة ينفع تتلبس و إمتى عشان تبقى ضامن إن البدلة اللي هتشتريها هتتلبس في المناسبة الصحيحة و  تعرف كمان إيه الموديلات اللي تقدر تلبس في أكتر من مكان لو كانت ميزانيتك محدودة و عايز تجيب أقل عدد من البدل و في نفس الوقت تلبسهم في أكتر من مناسبة.

لو أنت على وشك النزول و شراء بدلة جديدة يبقى لازم تعرف الفرق بين  الموديلات المختلفة للبدل الرجالي  و وظيفة كل موديل عشان قرارك يبقى نابع عن علم و معرفة مش قرار طائش .

  الموديلات المختلفة للبدل الرجالي  

1- البدلة اللي بزرار واحد (One Button suit) :

11

ظهرت و اشتهرت في الستينات و السبعينات  و كانت عبارة عن ثورة ضد الموديلات التقليدية في الفترة دي واللي كانت عبارة عن البدل اللي ليها 3 زراير او زرارين .

لازم تحط في اعتبارك ان البدلة اللي بزرار واحد هي للخروجات المسائية مش للشغل .. عشان كده لو انت بتدور على بدلة للشغل يبقى الموديل ده مش لازم يكون في اوائل اختياراتك  .

الموديل ده بيبقى ممتاز للرجالة اللي جسمهم رفيع . يعني لو انت كرشك مليان شوية يبقى اوعى تفكر فيها .

زرار البدلة لازم يكون مقفول طول ما انت واقف – ماشي – بتتحرك و لازم يكون مفتوح و انت قاعد علشان ما تشوهش شكلها .

اقرأ أيضاً : تعرف على الطول المناسب لجاكت بدلتك

2- البدلة اللي بزرارين ( Two Button Suit Style ) :

21

الموديل ده اسمه الموديل الكلاسيكي .. دايما موضة لانه يعتبر الشكل الستاندارد بتاع البدل .. الموديل بيبقى شكله جميل على تقريبا كل انواع اجسام الرجالة .

لو بتفكر تشتري اكتر من بدلة يبقى لازم تحط في اعتبارك ان واحدة منهم عالاقل هتكون من الموديل ده بس حط في اعتبارك انها وعلى الرغم من انها تقريبا موديتها ما بتبطلش ابدا لازم كل 5 سنين تقارنها مع الستايلات الجديدة علشان تشوف لو شكلها بقى موضة قديمة مقارنة باللي طالع جديد و لا لسه تمام .

اقرأ أيضاً  : تعرف معنا على موديلات الجاكت الرجالي و الوقت المناسب لارتداء كل نوع

3- البدلة اللي بـ 3 زراير . ( The Three Button Suit Style ) :

31-1024x1024

من اكتر البدل اللي بتلاقيها منتشرة في اماكن العمل المختلفة .

ومن اهم مميزاتها انها بتبقى شكلها مناسب جدا عليك لو انت من الرجالة الطويلة اكتر من اي موديل بدل تاني لان بما انها ليها 3 زراير فمكان الزراير دي بيبقى اعلى في جاكت البدلة و بالتالي بتخلق توازن و تناسق لشكل جسمك الطويل .

لو بتدور على بدلة للشغل يبقى لازم تفكر في الموديل ده من البدل .

وانت لابس الموديل ده من البدل دايما احرص انك ما تقفلش ال3 زراير كلهم لو انت واقف او بتتحرك علشان ما يبقاش شكلك مش مرتاح و متزمت قوي .. دايما اقفل اول زرارين او اخر زرارين .. بس ابدا مش ال 3 ولا تقفل زرار واحد بس .

اقرأ أيضاً : كل ما تحتاج معرفته عن بدلتك

4- البدلة اللي باربع زراير .

41

الموديل ده من البدل ماعادش منتشر قوي و معظم اللي بيلبسوه بيبقوا الرجالة اللي سنها كبير علشان متعودين عليها من ايام ما كانت موضة على ايامهم .

لو انت من الرجالة دي يبقى نصيحتنا ليك انك ما تقفلش ال 4 زراير كلهم ابدا .. اختار اما التلات زراير الاولانيين او الاخرانيين .

5- البدلة اللي ليها صفين زراير ( The Double Breasted Suit Style ) :

51

من البدل المميزة و المختلفة جدا .. و ما بتعتبرش من الموديلات اللي بتناسب اي حد .

اقرأ أيضاً : الكرش و كيفية إخفاؤه باللبس المناسب

ناس بتعتبر النوع ده من البدل محافظ و كلاسيكي قوي و ناس تانية شايقة انها مش ستايل زي باقي الموديلات .

الموديل ده بيبقى ممتاز على الناس اللي جسمها متوسط في الحجم و الطول او الطوال .

لو انت قصير و حابب انك تلبس الموديل ده يبقى اتأكد ان البدلة مظبوطة عليك بالمللي و ابعادها متناسقة مع بعض .

لو ناوي تنزل و تشتري بدلة من النوع ده يبقى اتأكد ان حواف ياقة البدلة السفلية اطول من العلوية علشان تتأكد انها على الموضة و يكون عدد زراير البدلة 6 زراير في صفين يعني 3 زراير جنبهم 3 زراير لان ده العدد المعتاد و المثالي للزراير في النوع ده من البدل .

جاكت البدلة دي لازم بيجي مع بنطلون رجليه مش ضيقة علشان تحافظ على توازن شكلك العام .. و احرص دايما ان لون البدلة يبقى غامق علشان تحس انها ملمومة عليك و تقدر تلبسها مع اي لون كرافات تحبة .

6 – التوكسيدو ( The Tuxedo Suit Style ) :

وهي اقصى درجات الفورمال في البدل و بتيجي في موديلين :

  – بصف زراير واحد : وهو الشكل الرسمي و الكلاسيكي واللي بيليق على معظم الرجالة و اجسامهم .

6-682x1024

  – بصفين من الزراير : وهي بتشبة البدل اللي ليها صفين زراير  و دي بتبقى مثالية للرجالة الطويلة قوي .

8

الفرق بين  الموديلات المختلفة للبدل الرجالي العادية  و التوكسيدو :

 التوكسيدو فورمال اكتر و بتبقى في العادة من لون واحد للبنطلون و الجاكت و الجيليه و اللي بيبقى لونهم اسود و معظم الوقت بتتلبس مع بابيون بدل الكرافات و بيبقى ياقتها و حرف الجيوب بيبقوا ساتان و احيانا الشريط الساتان ده بيمتد للجانب بتاع رجل البنطلون .

البدلة ممكن تبقى بألوان مختلفة و احيانا لون البدلة بيبقى مختلف عن البنطلون و بتبقى كلها من نفس القماشة ما عدا البطانة بتبقى من قماشة مختلفة .

7- البدل الصباحية :

9

وهي مش منتشرة قوي في الشرق الاوسط و بلدها الاصلي اوروبا .. وهي بتتميز بان الجاكت بتاعها بيبقى طويل جدا ( زي البالطو) و تم تصميمها لان الاوروبيين شافوا انه مش لطيف انهم يلبسوا لبس ليلي في النهار و بالتالي غيروا في شكل الجاكت و خلوه مختلف .

البدلة النهارية بتبقى عبارة عن جاكت على شكل بالطو طويل او بالطو لحد الوسط و بنطلون من نفس اللون .

احنا متوقعين ان الموديل ده هيبدأ يظهر و ينتشر في مصر مع انتشار الافراح اللي بتتعمل الصبح .

و بكده نبقى عرفناك على  الموديلات المختلفة للبدل الرجالي  و دلوقتي كل اللي عليك إنك تشوف الموديل اللي أنت محتاجة و تنزل تشتريه .

سيعجبك أيضاً

تعليق واحد

اضف رد

لن يتم نشر البريد الإلكتروني . الحقول المطلوبة مشار لها بـ *

*