الإثنين , 5 ديسمبر 2016
القميص داخل البنطلون .. كيف أحقق هذه الطلة بمثالية

القميص داخل البنطلون .. كيف أحقق هذه الطلة بمثالية

مع دخول الصيف و ارتفاع درجات الحرارة بيلجأ ناس كتير للتخلي عن البدلة و استبدالها بطلة القميص داخل البنطلون خصوصاً لو شغلك بيحكم عليك يبقى لبسك فيه فورمال .

ومع إن الطلة دي تعتبر من الطلات البسيطة الأساسية في اللبس الفورمال الصيفي إلا إنها ممكن تتحول لكارثة بكل بساطة لو القميص وهو جوا البنطلون كان شكله مبهدل و واسع أو طالع من كل جنب و ده في حد ذاته شيئ مرفوض في مكان العمل اللي المفروض إنت بتعبر عنه .

فالأماكن و المناسبات اللي بنلبس فيها لبس فورمال أو سيمي فورمال بتبقى أماكن رسمية و بالتالي لازم طلتنا فيها تكون طلة رسمية و شيك لإن ده بيعكس مدى اهتمامنا بالظهور بشكل كويس فيها و عشان كده بنحاول على قد ما نقدر نعرف الخبايا و الأسرار و التريكات اللي تخلي شكلنا شيك و ممتاز طوال وجودنا في الأماكن أو المناسبات دي منغير ما كل شوية نقلق و نعدل في هدومنا .

النهاردة هيكون كلامنا على طلة القميص داخل البنطلون و اللي بتعتبر أسهل الطلات الرسمية اللي ممكن الراجل ينفذها و اللي ما بتحتاجش في العادة منه يصرف مبالغ كبيرة و لا يلبس حاجات كتيرة بتخنقه عشان يبقى شكله فورمال و هو رايح الشغل مثلا أو رايحة حفلة خاصة .. لو بتحب تلبس اللبس ده يبقى تابع معانا في السطور اللي جاية خدعة بسيطة هتساعدك كتير من غير ما تتعب .

إزاي أحقق طلة القميص داخل البنطلون

تكنيك بسيط لو استعملته إنت بتلبس الصبح هيساعدك يبقى شكلك مثالي طول اليوم و هيخلي طلتك شكلها بروفيشنال حتى لو كان القميص واسع عليك حبتين :

أول حاجة اختار قميص طويل عشان يبقى ثابت في مكانه لما تدخله جوا البنطلون .

تاني حاجة اختار بنطلون مقاسة مثالي عليك و مش واسع .. و لو حاسس إن البنطلون وسطه مش مظبوط قوي يبقى إلبس معاه حزام مقاسه كويس عليك .

تالت و آخر خطوة هتعملها إنك هتمسك القميص من الجنبين و تثني أي وسع بطريقة أنيقة و تثبته زي ما موضح في الصورة في ” كمر ” البنطلون ” .

القميص داخل البنطلون

اتباعك للخطوات التالية هتخليك تحقق طلة القميص داخل البنطلون بالطريقة المثالية و هتمنع قميصك من إنه يبقى واسع من عند منطقة الوسط و كل شوية يطلع من مكانه و يبقى شكله مش أنيق .

سيعجبك أيضاً

اضف رد

لن يتم نشر البريد الإلكتروني . الحقول المطلوبة مشار لها بـ *

*