الإثنين , 5 ديسمبر 2016
الفرق بين الكيراتين والبروتين والكولاجين ؟

الفرق بين الكيراتين والبروتين والكولاجين ؟

 الفرق بين الكيراتين والبروتين والكولاجين هو السؤال الشاغل لمعظم البنات اللي بتحاول تلاقي علاج لشعرها أو فرده و مش عارفين نختار أي علاج من دول هو العلاج الصحيح و المناسب لشعرنا المجهد و المقصف .

كتبت فوزية دوت كوم.

الشعر الناعم حلم كل البنات حتى اللي شعرهم حلو عايزينه يبقى أحلى ، وده مابقاش صعب دلوقتي فيه كذا طريقة لفرد الشعر زي الكيراتين و البروتين و الكولاجين كل واحد ولي سعره وطريقته وفوايده وأضراره.

 الفرق بين الكيراتين والبروتين والكولاجين 

الكيراتين أنواع في البرازيلي وهو أول حاجة ظهرت بعديه الأمريكي وكمان في اللبناني وده ماننصحش بيه وهو أقلهم في السعر مابيزيدش عن 500، قبل أي حاجة لازم تتأكدي من أسم الشركة ونوع المنتج فيه أنواع بيزيد فيها نسبة الفورمالين ودي بتأذي الشعر وعشان كده نعتبر الكيراتين مضر كمان المادة بتسبب مشاكل في التنفس ومضرة جدا للعينين والجهاز التنفسي، كمان لازم نعرف طريقة الاستخدام عشان في أنواع مابتناسبش الشعر المصبوغ أو المعمول فرد قبلها كتير.
أسعاره إزازة الكيراتين اللي ممكن تكفي أكتر من واحدة سعرها بيكون مابين
1000 – 2500 بس طبعا على حسب طول الشعر وكثافته، بس ياريت نبعد عن الأسعار المبالغ فيها عشان الكيراتين مش دايم هو بيفضل من 2 – 6 شهور وبرضو على حسب سرعة طول الشعر.
البروتين مابيستخدمش الفورمالين وهو ده اللي خلاه أحسن من الكيراتين، بيحتوي على مكونات بتغذي الشعر زي
زيت الأرجان المغربي والسليكون، علشان نتأكد إن المنتج مافيهوش فورمالين هنسخنه وطبعا ريحة الفورمالين لو موجود هتظهر على طول.
أسعاره
إزازة البروتين بيتراوح سعرها مابين 2000 – 4000 وطبعا على حسب نوع الشعر وطوله وكثافته، بيفضل في الشعر تقريبا نفس مدة الكيراتين بس الفرق أن البروتين بيعالج الشعر الجديد اللي بيطلع من التقصيف.
الكولاجين ده أجدد حاجة نزلت وأحسنهم للشعر لأنه بيعالج الشعراية من بدايتها، وطبعا مافيهوش مادة الفورمالين كله مواد بتكون الشعر فلما نستخدمه بيفيده، عشان الكولاجين بيوصل لمسام فروة الرأس فبيكون تأثيره كبير.
أسعاره بيكون غالبا مابين
1000 – 2000 وبرضو على حسب نوع وكثافة الشعر، بس الكولاجين مابيثبتش في الشعر مدة طويلة ولأنه بيعالج أكتر منه بيفرد فممكن يتكرر كذا مره في فترات قليلة وبيدي نتايج هايلة.
بعد الفرد علشان تحافظي على شعرك في حاجات لازم تبعدي عنها خالص زي المياه المالحة والكلور اللي بيكون في البيسين، وكمان الكلور والأملاح موجودين في المياه العادية فنقلل غسيل الشعر لمرتين في الأسبوع مثلا، أي منتج هنشتريه للشعر بلسم أو شامبو نتأكد الأول إنه مافيهوش أملاح، وبكده هنحافظ على الفرد أطول وقت في شعرك.

download

دلوقتي بعد ما عرفتي  الفرق بين الكيراتين والبروتين والكولاجين هتختاري أي علاج من دول لشعرك ؟

سيعجبك أيضاً

اضف رد

لن يتم نشر البريد الإلكتروني . الحقول المطلوبة مشار لها بـ *

*