الإثنين , 5 ديسمبر 2016

الطريقة المثالية لتعليق البنطلونات في خزانتك

تطبيق البنطلونات حل سهل و سريع و بيوفر مساحة في دولابك لكن للأسف الحل ده ما بينفعش مع كل البنطلونات لأن فيه منها اللي ومع التطبيق بيتكسر و بتحتاج تكويه بعد كده و ده كابوس معظمنا بيحب يتجنبه فبيلجأ للتعليق .. بس هل تعرفوا  الطريقة المثالية لتعليق البنطلونات  ؟

بالنسبة للجينز و الليجنز و البنطلونات الرياضية فتطبيقها ما بيأثرش كتير على كويتها لأن القماش اللي مصنوع منها البنطلونات دي قوي و بالتالي ما بيتكسرش بسهولة زي البنطلونات القماش الكلاسيكية و عشان كده بننصح دايماً بتطبيق الجينز و توفير مساحة في الدولاب للبنطلونات الأكثر أهمية و اللي بنحتاج نلبسها وهي مكوية و مفرودة ١٠٠ ٪ .. طيب إزاي أعلق البنطلون بتاعي و أضمن إنه هيفضل مفرود ؟

 الطريقة المثالية لتعليق البنطلونات 

المشكلة مع التعليق هي إن مش كلنا عندنا الشماعات المخصصة لتعليق البنطلونات و بالتالي بنعلقها على الشماعات العادية و مع التقليب في الدولاب أحيان كتير البنطلونات بتقع من على الشماعة من غير ما ناخد بالنا و بنواجه الحقيقة المرة دي بس لما بنحتاج نلبس البنطلوب و نبص نلاقيه جثة هامدة في قعر الدولاب محتاج يتسفلت مش بس يتكوي .

تعليق البنطلونات على الشماعات العادية كل اللي محتاجه منك هو تكنيك بسيط لو استخدمته عمر البنطلون ما هيقع من عالشماعة تاني .. اتعرفوا معانا على التكنيك ده  :

  • هنبدأ تعليق البنطلون من الرجلين .
  • هنمسك البنطلون من عند الرجلين بحيث تكون الشماعة محطوطة بين كل رجل .
  • هنبدأ بتني الرجل الأولى و تعليقها على البار اللي بيبقى موجود في الشماعة من الأسفل .
  • هنمسك الرجل التانية و نتنيها فوق الرجل الأولى زي ما موضح كده في الصورة .

الطريقة المثالية لتعليق البنطلونات

كل ما كان البنطلون قماشته تقيلة كل ما هنحتاج إن الشماعة تكون قوية و عشان كده يفضل نستخدم الشماعات البلاستيك أو الخشب بدل من الشماعات السلك اللي بكل سهولة بتتني و الهدوم بتتزحلق من عليها و ده بيخليها ما تحافظش على كوية البنطلون و شكله المثالي .

دلوقتي كل اللي عليكم تعملوه تتبعوا خطوات  الطريقة المثالية لتعليق البنطلونات  و تختاروا الشماعة الصحيحة و تتمتعوا ببنطلونات مفرودة و أنيقة في أي وقت نحتاجهم فيه .

سيعجبك أيضاً

اضف رد

لن يتم نشر البريد الإلكتروني . الحقول المطلوبة مشار لها بـ *

*