الجمعة , 9 ديسمبر 2016
عيشها أخف واستبدل الريجيم بـ نظام غذائي صحي

عيشها أخف واستبدل الريجيم بـ نظام غذائي صحي

( الدايت) ! من أكبر المشكلات اللي بتواجه معظم الشباب والبنات في مصر، وخصوصاً في الفترة الحالية، ودائماً الكلمة دي بترتبط عند الناس بالمعاناة والحرمان وتعكر المزاج اللي بيبقى حقيقي فعلاً في معظم الأوقات اللي بنضطر فيها نتبع نظام غذائي صارم جدًا للتخلص من الوزن الزائد، وده اللي ممكن تفاديه باتباع قواعد بسيطة بتوصل بعد شوية إنها تبقى من نظامنا اليومي وهتساعدنا إننا نحافظ على الوزن وكمان تنقيصه بمعدلات جيدة قوي مع تفادي المعاناة إلى حد كبير.

كتب عصام رفاعي @essam_refai

المعلومات اللي هاكتبها هنا هي من نتاج تجربة شخصية قدرت فيها الحمد لله إني أنزل من وزن كبير جدًا لوزن معتدل، مريت بجميع أنواع الدايت والأنظمة الغذائية المتعبة والمريحة، وتوصلت إلى نظام غذائي مريح يعتمد على شوية قواعد بسيطة هتساعد على تثبيت الوزن إلى حد كبير، وكمان تنقيصه مع ممارسة الرياضة حتى ولو مش يومياً.

أيضاً : للرجال : فورمة الساحل في ٣ خطوات، كتالوج الجسم المثالي

النصائح كما يلي ( كيفية اتباع نظام غذائي صحي ) 

نظام غذائي

١- شرب المياه : شرب المياه من أهم العوامل اللي بتساعد في تخفيض والحفاظ على الوزن، وده لأسباب كتيرة أهمها إنها بتزوّد معدل إنفاق الطاقة في حالة الراحة بنسبة (٢٥ – ٣٠٪)، وبجانب إنها كمان في حالة شرب كباية مياه ساقعه قبل الأكل بنص ساعة فده بيآثر على كمية الأكل اللي في الوجبة وبيقللها لان في اوقات كتيرة الجسم بيخلط بين العطش والجوع… كمية المياه اللي المفروض تتشرب في اليوم بتعتمد على وزن الشخص بس المتوسط إنه على الأقل لازم يتم شرب ٢-٣ لتر يومياً متوزعين على مدار اليوم.

٢- الفطار : الاهتمام بوجبة الفطار من أكتر الحاجات اللي بتساعد على رفع معدل الحرق في الجسم، لازم وجبة الفطار تكون متنوعة وفيها النشويات البطيئة الهضم والألياف (مثل الشوفان) والفاكهة، وكمان يكون فيها بروتين كويس، ويعتبر البيض من أهم مصادر البروتين الممكن تناوله على الفطار… يفضّل قبل الفطار بنص ساعة على معدة فاضية أخذ كبايه مياه دافية بمعلقة عسل صغيرة، دي هتساعد على رفع معدل الحرق طول اليوم.

أيضاً : الملابس الرياضية التي تحتاجونها أثناء ممارسة الرياضة

٣- الوجبة الرئيسية (الغذاء/العشاء) لازم متتاخرش قوي، ويفضل تكون قبل معاد النوم بخمس ساعات على الأقل، وتكون غنية بالبروتين.

٤- لازم الجسم ميقعدش فترات طويلة (أكتر من ٤ ساعات) بدون أكل حتى لو بسيط ، ده بيدي تحذير للمعدة إن فيه حالة تجويع للجسم، وهيآثر إن الوجبة اللي هتكون بعد فترة عدم الأكل الطويلة الجسم هيحاول يخزنها ، وده في المجمل هيأثر على معدل الحرق العام في الجسم… ممكن حل الموضوع ده عن طريق وجبات خفيفة زي مكسرات (يفضل غير مملحة وغير محمصة) ، فاكهة وخضار ومعلقتين شاي زبدة فول سوداني أو شوكولاتة غامقة.

نظام غذائي

٥-  تغيير النظام اليومي للحركة، يعني مثال بسيط : إحنا بنستخدم المصعد في معظم المباني اللي بنروحها في يومنا، وممكن بس نغير مشوار واحد منهم بدل الإسانسير نستخدم السلم على الاقل مرة واحدة في اليوم…  برضه معظمنا شغلته مكتبية، ويفضل في الحالة دي إن كل ساعة مثلا نتمشي ٥ دقايق أو نعدل وضع المكتب لو المكان يسمح ونشتغل واحنا واقفين.

٦- العشاء يفضل إنه مايكونش ثقيل ويكون حاجة خفيفة، ويبقى قبل النوم بساعة على الأقل.

٧- مشروبات زي الشاي الأخضر (بعد كل وجبة)،  والجنزبيل والقرفة والقهوة (بدون سكر وبدون لبن) بتزود معدل الحرق ومفيدة للجسم بشكل عام طبعاً في إطار الاستخدام المسموح.

أيضاً : غادة عادل ليست معجزة فكوني مثلها باتباع هذه العادات الصحية

٨- تقليل السكريات والدهون الغير صحية والأكل المصنّع في المجمل، يعني لو مثلا أنت/أنتي بتستهلك الحاجات دي يومياً، اعمل يوم في الاسبوع متأكلش فيه منها خالص، وحاول كل أسبوعين مثلاً تزود اليوم ده تخليه يومين وهكذا، لحد ما توصل لأقل نسبة ممكنة تقدرعليها من استهلاك الحاجات دي.

٩- طبعاً من الحاجات المهمة جدًا هي ممارسة الرياضة، وخصوصاً الرياضات اللي بتساعد على بناء الكتلة العضلية وزيادتها، لأن ده بيؤدي إلى زيادة معدل الحرق العام للجسم، حتى في حالة الراحة، ومعاها لازم يتم الاهتمام بزيادة جرعة البروتين اليومية علشان تساعد في بناء العضلات.. وفي المجمل زيادة البروتين (في الإطار المسموح) بتساعد على نقص الوزن.

أيضاً : الجمال يكمن في عين الناظر .. أنت لا تختلفين عن المشاهير

النصائح دي معظمها بسيط وتنفيذها مش صعب خالص وبعد شوية بتتحول من  نظام غذائي  لروتين يومي، و ديه عن تجربه شخصيه على مدار سنين.. طبعا دي بتختلف عن الأنظمة الغذائية (الدايت) اللي بنضطر نلجألها، واللي بتعتمد على الوزن اللي محتاج تخفيضه وعلى نظام حياة الشخص اللي هيمشي عليها. 

سيعجبك أيضاً

اضف رد

لن يتم نشر البريد الإلكتروني . الحقول المطلوبة مشار لها بـ *

*