الجمعة , 9 ديسمبر 2016

اظهر اطول باختيار موديلات الملابس الصحيحة

في الوقت اللي البنات القصيرة بتقدر تظهر اطول بكل سهولة بانها تلبس جزمة بكعب .. فمشكلة الطول دي بتشغل رجالة كتير ، فكام راجل فكرو سأل نفسه إزاي اظهر اطول منغير تعب ؟ الموضوع مش صعب و ممكن تحقيقه بكل بساطة و علشان ملبس خان كل همه إنه يساعد أي حد و كل حد يظهر في أحسن مظهر و يكون مبسوط .. النهاردة عندنا شوية نصايح هتساعدك في الإجابة على السؤال الرجالي الأزلي ” إزاي اظهر اطول ” وفي نفس الوقت تبقى مرتاح أكتر مع طولك .

النهاردة هنقدملك نصايح بتركز على تعديل شوية تفاصيل في هدومك .. و كذلك هنديك لستة ببعض المحلات اللي ممكن تلاقي فيها الحاجات اللي تناسبك مهما كان طولك .

اظهر اطول باختيار بعض التفاصيل في لبسك

1- أول نصيحة معانا هي انك تركز على القطع المقلمة بالطول .. المقلم بالطول بيديك ايحاء انك اطول .. سواء كانت التقليمة دي في بدلة / تيشرت / شورت / او قميص .. اختارها دايما و انت مغمض .

2- اختار دايما النقشات اللي في هدومك بحيث تكون نقشات حجمها صغير .. سواء بقى كانت النقشة دي كاروهات او حتى رسمة على تيشيرت او نقشة في قميص .. كل ما تكون النقشة كبيرة كل ما هتاكل من جسمك و تظهره قليل و صغير .. علشان كده الزم النقشات الصغيرة .

folk-408_385x385-300x300

3- اختار القطع اللي مقاسك بالظبط .. ما بنقولش تكون ماسكة فيك .. بنقول مقاسك .

4- اهتم دايما بالتفاصيل و احجامها و ابعادها .. يعني سواء كنت لابس كرافات يبقى اتأكد ان طولها متناسق مع جسمك .. ما تسيبهاش طويلة لحد تحت الحزام ! … لو هتلبس حزام يبقى اختاره رفيع لانه لو عريض هياكل من جسمك و يظهرك اقصر .. لو هتلبس ساعة يبقى اختارها منبسطة مش ضخمة … البابيون و منديل جيب البدلة اختارهم صغيرين مش كبار زي بتوع فطوطة !

اقرأ أيضاً : اظهر أطول عن طريق اختيار ألوان ملابسك بذكاء

5- دايما قصر بنطلونك للطول المناسب .. ما تسيبوش طويل و مكرمش فوق الجزمة و لا تقصره قوي .. في الحالتين شكلك هيبقى سيئ و هيفاقمالمشكلة مش هيحلها .

hqdefault

6- تجنب تماما المقلم بالعرض حتى لو كنت رفيع .. المقلم بالعرض مع انه بيساعد الرفيعين يظهروا اعرض الا انه للاسف بيقصر اكتر .

7- اوعى تلبس جزمة نعلها عالي علشان تزيد من طولك .. في العادة الحركة دي بتخلي شكلك اسوأ .

8- تجنب تماما الهدوم الواسعة و البنطلونات الباجي .. الستايل ده مابيساعدكش تظهر اكبر ولا حاجة بالعكس ده بيخليك تظهر قليل في الحجم و مبهدل .

9- اوعى ثم اوعى تختار البدل او الجواكت اللي ليها صفين زراير .

BLOG-SOLOIO-la-última-moda-en-americanas-para-hombre

10- ما تترددش ابدا انك تتعامل مع خياط نضيف بحيث انه يظبط عليك كل هدومك .. يرفعلك كم قميص .. يقصرلك تيشرت او بنطلون .. و هكذا .

ولو بتتسائل عن المحلات اللي ممكن تلاقي فيها حاجات مناسبة ليك منغير لف و تعب هنقولك عليهم دلوقت :

1- محلات Gap : في الوقت اللي القمصان و البولو شيرت اللي عنده دايما بتكون طويلة جدا و بتناسب الطوال اكتر الا انه من افضل الاماكن اللي تلاقي عنده فيها بنطلونات كاجوال و سويتشيرتات .

2- محلات Levi’s : الجينز اللي عندهم ممتاز .. جايز يكون طويل شوية لكن الطول مش مشكلة ابدا لان التقصير عند الخياط مش هياخد منك ثواني و لا هيكلفك كتير .

3- محلات Lacoste : غالي طبعا لكن يعتبر من أفضل الاماكن اللي ممكن تشتري منها تيشيرتات بولو لانهم بيستخدموا فيها القياسات الاوروبية .. جرب مقاس رقم 3 لو انت مش مليان و هتلاقيه مقاسك تمام :)

4- محلات H&M : اسعاره مقبوله لمعظم الناس و بيعتبر من المحلات القليلة اللي تلاقي عندها مقاسات small و x small كمان .. ممتاز فيما يتعلق بالبلوفرات و البليزرز .

دلوقتي  اظهر اطول  بكل بساطة عن طريق اتباع الخطوات اللي قولناهالك و طبقها بحذافيرها ووفر على نفسك التفكير و القلق .

سيعجبك أيضاً

2 تعليقان

  1. شكرا لك على الموضوع الرائع و لكن عندي سؤال بسيط … اذا كنت طويلا و صاحب كرش فما هي طريقة لبسي كي لا يظهر الكرش ؟؟ و شكرا لكم مرة اخرى

    • فريق ملبس خان

      احتار القمصان اللي مقاسك بالظبط و تكون ألوانها داكنة أو نقشتها كبيرة بدل من التيشيرت

اضف رد

لن يتم نشر البريد الإلكتروني . الحقول المطلوبة مشار لها بـ *

*