الإثنين , 5 ديسمبر 2016

أهم 14 قطعة في خزانة كل امرأة

دولاب البنات مليان هدوم أشكال و ألوان لكن هل فيه   أهم 14 قطعة في خزانة كل امرأة   ؟ ده السؤال اللي لازم كل بنت و ست تسأله لنفسها لأن الهدوم مش بكترها لكن باستخداماتها و لو عندنا هدوم كتير شبه بعض يبقى أكيد هيجي وقت و نواجه فيه مناسبة معينة و مش هنلاقي الملابس اللي تليق عليها !  عشان كده قررنا النهاردة نكلمكم عن  أهم 14  قطعة في خزانة كل امرأة  و عايزينك تحرصي إنهم يكونوا في دولابك .

 أهم 14 قطعة في خزانة كل امرأة 

1- تيشيرت ابيض سادة .
سواء كان ياقته على شكل حرف V او مدورة .. التيشيرت الابيض محدش يقدر يستغنى عنه .. ممكن تلبسيه لوحده على بنطلون جينز عشان تحصلي على طلة كاجوال او على بنطلون كلاسيكي و انتي رايحة الشغل .. ممكن يتلبس تحت جاكت او يتلبس عليه فيست .. التيشيرت الابيض ضروري في دولاب كل بنت .

2- البنطلون الجينز .
مع اختلاف درجاته و قصاته مفيش حد يقدر ينكر ان اول ما بنفكر في طلة كاجوال بييجي في دماغنا البنطلون الجينز .. الجينز ممكن يتلبس لمشاويرك مع الاطفال .. و انتي بتشتري طلبات البيت .. وانتي خارجة مع صحابك .. و كمان ممكن تلبسيه مع قميص و جزمة بكعب و تحوليه لجزء من طقم كلاسيك لطيف .

اقرأ أيضاً : قطع أساسية يجب توفرها في دولاب كل رجل

3- بلوفر basic .
هاتيه بلون محايد و اتمتعي بلبسه لوحده مع بدايات فصل الخريف .. البسي تحتيه قميص لطلة كلاسيكية .. البسيه تحت جاكت او بالطو في الشتا .. ببساطة هو القطعة الوحيدة اللي مش محتاجة تفكير كتير لو محتارة تلبسي ايه و انتي مستعجلة .

4- جزمة سودا بكعب عالي .
هنا ما بنتكلمش عن الكعوب الخرافية اللي مكانها فاترينات المحلات و رجلين الفنانات .. بنتكلم عن جزمة كعبها معقول و مريحة في اللبس .. الجزمة دي هي مفتاحك لكل المناسبات .. سواء لبستيها وانتي رايجة مقابلة شغل او وانتي رايحة الشغل نفسه .. او لبستيها لمناسبة رسمية زي كتب كتاب او حتى فرح .. و كمان اكيد هتحتاجيها للاسف لو رايحة عزا .. يعني باختصار ما ينفعش ما يكونش عندك جزمة سودا بكعب في دولابك .

5- شنطة Cross .
سواء كنتي طالبة في المدرسة او الجامعة .. سيدة عاملة .. او حتى ست بيت … الشنطة الكروس هي سلاحك .. ميزتها انك مش لازم تكوني ماسكاها في ايدك .. يعني بتعلقيها و ما بتنشغليش بيها تماما سواء و انتي طالعة من محاضرة او رايحة تعملي شوبنج و تشتري طلبات و محتاجه ايديكي الاتنين علشان تشيلي الطلبات دي او خارجة من الشغل و معاكي ورق و مفاتيح و موبايل و مج القهوة بتاعك .. ده غير كمان انها اأمن بكتير من الشنطة العادية اللي بقت بتتخطف دلوقتي بكل سهولة من اي حرامي على موتوسيكل .
هاتيها بالحجم اللي يناسب احتياجاتك و بلون مميز علشان لو حبيتي في يوم تستخدميها كـ clutch وانتي خارجة خروجة شيك .

6- قميص ابيض سادة .
اسهل و ارخص قطعة ممكن تحول بنطلونك او جيبتك لطقم كلاسيكي شيك .
عندك كتب كتاب و مش عارفة تلبسي ايه ؟ قميصك الابيض و البسي عليه جيبة سادة و جزمة بكعب و شوية اكسسوارات و بقى عندك طقم ممتاز .
عايزاه للشغل ؟ البسيه على بنطلون اسود و جزمة سودا و ممكن عيه جاكت كلاسيكي او فيست و بقيتي تمام .
رايحة شوبنج مع صحابك ؟ البسية على بنطلون جينز و جزمة فلات او صندل و اتمتعي بطلة بسيطة و شيك جدا .

7- جيبة بقصة القلم الرصاص .. pencil skirt .
هتحتاجيها لمناسباتك الرسمية .. كل اللي هتعمليه انك تقرري هتلبسيها مع قميص و لا بلوزة .. اظن مفيش اسهل من كدة !
شغلك بيطلب منك انك تكوني فورمال ؟ هاتي جيبة سودا و جيبة بلون تاني و البسي عليهم كل قمصانك و بلوزاتك الرقيقة و مش هتحتاجي تصرفي كتير على طلتك و هيبقى عندك طلة جديدة لكل يوم في الشغل .

8- جاكت جلد .
استثمري فلوسك في جاكت جلد خامته كويسة لانك و بكل بساطة هتلبسية كل شتوية لو جبتيه بموديل بسيط و مفيهوش حركات علشان موضته ما تقدمش و نضمنلك انه هيعيش معاكي العمر لو اهتميتي بيه صح .
الجلد ما بيتوسخش بسرعة .. بيدفي .. ممكن تلبسيه من بداية الخريف و لحد اخر يوم في الشتا .

9- ساعة محترمة .
ما تبخليش على نفسك و اشتري ساعة محترمة و ممكن تلبسيها على كل هدومك .. الساعة بتعتبر من الاكسسوارات اللي بتتلبس في اي وقت و على كل حاجة (الا السيواريهات – دول بيحتاجوا ساعات رقيقة) و من غير ما تفكري كتير .

10- فستان سادة بطول مناسب .
الفستان السادة زي قطعة الصلصال ممكن تشكليها زي ما انتي عايزة بشوية ذكاء .. البسيه على جزمة فلات و سكارف اتمتعي بيه عالبحر .. البسيه مع كعب و حزام ميتال عريض و احضري بيه مناسبة .. البسيه تحت جاكت كلاسيكي و روحي بيه الشغل .. السما حدودك .

11- جزمة فلات .
اختاري جزمة مريحة بلون مناسب .. كلنا بننزل نعمل مشاوير و مفيش حاجة احسن من الجزمة الفلات علشان اللف .. لو كنتي من البنات اللي ما بتحبش تلبس الكوتشي يبقى الجزمة الفلات هي صديقك المفضل .. البسيها في الشغل في الكلية و انتي نازلة تتمشي مع الاولاد و انتي رايحة تعملي شوبنج .. ببساطة ممكن تلبسيها كل يوم و طول اليوم مهما كانت طبيعة حياتك .

12- نظارة شمس .
هنا لينا وقفة .. النظارة الشمس ضروري في دولابك ولازم تكون من ماركة محترمة علشان تضمني انها مش بتئذي عنيكي .. زي ما بتحطى صن بلوك على جلدك و تحمي جسمك لازم كمان تحمي عنيكي من اشعة الشمس الضارة اللي ممكن توصلها لو لبستي نضارة نوعها رديء.. ده غير انها من اشيك الاكسسوارات اللي ممكن تلبسيها في فصل الصيف .
نظارة واحدة غالية محترمة شكلها مناسب لشكل وشك احسن من 20 نظارة رخاص حتى لو شكلهم حلو .

13- هاف بوت .
كل البنات للاسف مع اول حبة مطر في فصل الخريف بيلبسوا البوت اللي واصل لحد زورهم !! غير ان شكلك كده مش لطيف لان غالبا في الخريف الجو بيبقى جميل كمان البوت اللي رقبته عاليه ده شتوي 100% و شكله بيبقى شاذ و هو ملبوس و الجو لسه حلو !
الهاف بوت بيعتبر من  أهم 14 قطعة في خزانة كل امرأة  و البسيه من اول يوم في من فصل الخريف لحد اخر يوم في الشتا و محدش هيقدر يقول كلمة على ستايلك .
هاتيه جلد لو عايزه حاجة عملي عشان ما يبوظش من المطرة و هاتي باللون اللي يعجبك و البسيه على جيبة – بنطلون – فستان اللي يريحك .

14- بالطو .
مفيش حاجة بتدفي في البرد بتاع الشتا قد البالطو و كلنا متفقين على كده .. و الجميل فيه انك ممكن تلبسي تحتيه اللي يعجبك سواء كان اللي تحتيه ده خفيف او تقيل لان البالطو هيحميكي من الجو مهما كان .
هاتيه بقصة تناسب جسمك علشان مايظهركيش اتخن و بقماشة سهلة التنظيف لانك و ببساطة هتلبسيه كتير .1

و بكده نبقى عرفناكي على  أهم 14 قطعة في خزانة كل امرأة  ، كل اللي عليكي تعمليه إنك تشوفي إيه اللي ناقصك منهم و تكمليه في أسرع وقت ممكن .

سيعجبك أيضاً

تعليق واحد

  1. This awesome blog is obviously entertaining and also factual. I have found a bunch of interesting advices out of it. I ad love to go back again and again. Thanks a lot!

اضف رد

لن يتم نشر البريد الإلكتروني . الحقول المطلوبة مشار لها بـ *

*