الإثنين , 27 فبراير 2017
الملابس الفورمال في الصيف للرجال و النساء

الملابس الفورمال في الصيف للرجال و النساء

الصيف هجم فجأة و منغير مقدمات .. و في الوقت اللي معظم الناس طلعت الشورتات و التيشيرتات القطن و البنات بدات في لبس البنطلونات الخفيفة و البلوزات الرقيقة .. فيه ناس للاسف ظروف شغلها بتضطرهم انهم يلتزموا باللبس الفورمال او بيصادف أنهم معزومين على فرح الصبح و مش عارفين يلبسوا بدلة ازاي في الحر ده و بالتالي محتاجين يتعرفوا على أهم قطع  الملابس الفورمال في الصيف  عشان يحافظوا على شكلهم و الحر ما يضايقهمش.

لو انتم من الناس دي فالموضوع ده مخصوص علشانكم لإننا هنذكر فيه بالتفصيل أهم قطع الملابس اللي المفروض تساعدكم تفضل طلتكم كلاسيكية و أنيقة و في نفس الوقت ما تحسسكمش بالحر الرهيب و لا أي ضيق ..

  الاول هنتكلم عن نصايح عامة للجنسين فيما يتعلق بـ  الملابس الفورمال في الصيف :

1- البس قماشات خفيفة تمتص العرق و بتسمح لجسمك بالتنفس .. مجرد ان القماش بيسمح للهوا انه يوصل لجسمك و بيمتص العرق ده هيساعدك كتير .

2- البس الوان فاتحة : الالوان الفاتحة بتعكس نور الشمس بعكس الغوامق اللي بتمتصه وبالتالي بتخليك فطسان .

3- تجنب الهدوم اللي ماسكة في الجسم .. حتى لو خفيفة و بتمتص العرق مجرد ان فيه حاجة ماسكة عليك في الحر ده هتخليك مش مرتاح ابدا .

ندخل بقى على المهم .

الملابس الفورمال في الصيف  للرجال 

– بدل القميص اللي بكم البس قميص نص كم مع بنطلون كلاسيكي .. اختار القميص زي ما اتفقنا لونه فاتح (ابيض – بيج -لبني … الخ ) .

11

اقرأ أيضاً : تعرف على الملابس المناسبة لمقابلة العمل

– لو شايف ان القميص اللي بنص كم مش مناسب لظروف شغلك يبقى خليك في اللي بكم و اختاره اما يكون قطن  او كتان بس خلي في بالك ان الكتان بيتكرمش بسرعة جدا فلو انت من الناس اللي شغلها مكتبي يبقى خليك في القطن احسن .

2

– مصمم انك تلبس قميص و بنطلون و عليهم بليزر ؟ مفيش مشاكل .. اختار بليزر قماشته صيفي … كتير من البليزرز اللي موجوده في المحلات شكلها صيفي لكن لو بصيت على المواد اللي بيتكون منها هتلاقي داخل فيها صوف .. يبقى اللي عليك انك تعمل واجبك و تدور على بليزرز قطن او كتان .

3

– لازم تلبس بدلة كلاسيكية ؟ بسيطة .. دور على بدلة يكون الجاكت بتاعها فيه نص بطانة … يعني ايه نص بطانة ؟ يعني ليه بطانة في منطقة الكتفين و الكم بس  و احرص ان البطانة دي تكون من الفوسكوس بدل البطانة الحرير .. مش لاقيها ؟ يا سيدي فصلها .. سهلها على نفسك .. الجاكت اللي بنص بطانة شكله من بره ما يفرقش اي حاجة عن الجاكت اللي ببطانة و بالتالي محدش هيعرف الفرق .. انت بس اللي هتحس بيه لانه هيكون اخف كتير .

4

– البس فانلة قطن تحت هدومك الكلاسيكية دايما .. هتمتص العرق و تحافظ على برودة جسمك .. و كمان هتحميك من الاحراج .. تخيل تقلع الجاكت بتاع البدلة اول ما تدخل الشغل و هوب تلاقي قميصك كله مية !

– البابيون اختيار لطيف يغنيك عن الكرافات و طالع موضة جدا .. لو عندك فرح خصوصا لو الصبح يبقى البابيون هو صديقك المفضل .

الملابس الفورمال في الصيف للنساء

– من مميزات لبس البنات انه سهل جدا تحولي قطعة عادية لكلاسيكية بشوية اكسسوارات .. و بالتالي فممكن جدا تلبسي تيشيرت قطن سادة على جيبتك او بنطلونك الكلاسيكي و مع عقد شيك وبروش مثلا وبكدة هتحوليه من قطعة بيزك لقطعة كلاسيكية .

5

– البسي فستان بطول مناسب (يفضل يكون سادة) و يكون موديلة على قد الجسم ( مش واسع و كلوش) مع جزمة بكعب و حزام و clutch .

6

– قميصك القطن او الكتان السادة ممكن تلبسيه مع جيبة قصة القلم الرصاص او حتى جيبة منفوشة طولها تحت الركبة و دخلي القميص جوة الجيبة مع جزمة ببوز رفيع .

7

اقرأي أيضاً : الكارينا و بدائلها الصحية

– جربي لبس بلوزة شيفون خفيفة و عليها كارديجان و عليهم حزام بحيث يكون مربوط فوق البلوزة و الكارديجان .

8

-البليزر الكتان الخفيف ممكن تلبسيه على فستان خفيف كت .

– تجنبي تماما الكارينا الليكرا .. بتلزق في الجيم و ما بتمتصش العرق و لا بتخلي جسمك يتنفس .. البديل ليها هي البلوزات ال basic القطن الموجودة في معظم المحلات بأسعار مناسبة جدا اي كانت ميزانيتك .

– لو محجبة يبقى اختاري الحجاب القطن او الشيفون .. الحرير بيحرر اكتر و بيخلي شعرك كمان يعرق .

لو عندك افكار تانية تحب تضيفها ممكن تسيبها في كومنت عشان غيرك يستفيد منها كمان .

و بكده نبقى عرفناكم على  الملابس الفورمال في الصيف  و اللي هتحافظ على شكلكم الكلاسيكي أثناء العمل أو المناسبات الخاصة و في نفس الوقت هتساعدكم في محاربة الحر و الشعور بالراحة حتي في عز الصيف .

سيعجبك أيضاً

8 تعليقات

  1. I loved your blog article. Much obliged.

  2. I really enjoy the article post. Fantastic.

  3. ازاي اتخلص من حبوب البشره الدهنيه

    • فريق ملبس خان

      عن طريق غسل البشرة بغسول مناسب لنوع بشرتك مرتين يومياً يليها استخدام تونر مناسب وبعدها مرطب مناسب للبشرة الدهنية .. كمان استخدام ماسك تقشير مرة أسبوعيا والمدوامة على الروتين ده مع تجنب النوم بالمكياج وكذلك تغيير أكياس المخدات وكمان فوطة الوش يومياً

اضف رد

لن يتم نشر البريد الإلكتروني . الحقول المطلوبة مشار لها بـ *

*